|
КЪУРБАН БАЙРАМЫНЪЫЗ ХАЙЫРЛЫ ОЛСУН!
Бисмилляхир Рахманир Рахим!
Сайгъылы мусульманлар, азиз ватандашлар!
Юдже динимиз Ислямнынъ экинджи буюк байрамы – Къурбан байрамына етип кельдик.
Ноябрь айынынъ 27, 28, 29 ве 30 куньлери эпимиз бир-биримизни Къурбан байрамынен хайырлайджакъмыз, аджыларымыз Меккеде хадж ибадетини ерине кетиреджеклер, алы-такъаты еринде олгъанлар Аллах ризасы ичюн къурбан чалып, этлерини фукъарелерге даркъатаджакълар. Диний байрамларымыз – му’минлер ичюн къуванч, озьара ярдымлашув, сой-соп багъларынынъ къавийлешюви ве багъышлав куньлеридир. Шунынъ ичюн, дёрт кунь девам этеджек Къурбан байрамында озьара бирлик ве бераберлигимизни нумайыш этейик, къартларымызны, сой-акърабаларны, хаста ве чаресизлерни зиярет этип, эвлятларымызны къувандырайыкъ, гонъюллерини котерейик, оларгъа байрамнешэсини яшатайыкъ!
Мубарек Къурбан байрамы мунасебетинен, бутюн мусульманларны Къырым мусульманларынынъ муфтияты ве шахсен озь адымдан самимий хайырлай, аятларынъызда бахт-сеадет тилейим!
Эпимизге Къурбан байрамы хайырлы ве мубарек олсын, байрам софраларынъыз берекетнен толсын! Аллах Тааля нидже байрамларгъа сагъ-селямет къавушмакъны насип эйлесин!
Амин!
Хаджы Эмирали АБЛАЕВ,
Къырым мусульманларынынъ муфтиси.
* * *
Аллаху Тааля даима халкъымызнынъ имаеджиси олсун!
Мухтерем Къырым мусульманлары! Сайгъылы ватандашлар!
Мукъаддес Къурбан Байрам (Ид-Аль-Адха) шерифинъиз мубарек олсун!
Дюньяны туткъан Ислям динимиз бизге сынъырсыз ватанперверлик дуйгъуларыны, адалетли миллий арекетимизде енъильмез рух ве кучь-гъайрет, бири-биримизге урьмет, севги ве бирдемлик багъышлай.
Аджайип улькемизнинъ саиби олмакъ ёлунда Юдже Раббимиз бутюн ишлеримизде таянчымыз ве аркъамыздыр.
Иманы къавий, ниети темиз, япкъанлары миллет ве умметнинъ менфаатына, макъсадына уйгъун олса, Алла Тааля онъа даима къолтутар.
Джумленъизге сагълыкъ, бахт-сеадет, бол софралар, къуванчлы куньлер тилеймиз! Алла чалгъан къурбанларымызны къабул эйлесин ве даима халкъымызнынъ имаеджиси олсун!
Терен самимийликле Къырымтатар Миллий Меджлиси.
|
